Fíos de la mesma sicodelia

Fíos de la mesma sicodelia

Tendría primero que falar de mio pá faciendo ximnasia. Nel salón, la esterilla pel suelu, les peses, cola música al altu la lleva. Tendría que falar de les portaes los vinilos, del triángulu esi tan raru, col arcu iris y daquello escuro, y los sintetizaores como una llingua incomprensible pa los mios pocos años. Tendría que falar primero d'una infancia mui feliz o la primer alcordanza del amor, en palabres refulxentes y enormes. De la playa y l'aire frío de marzu, de les sos manes guapes y curtíes de tanto da-y a la guitarra.

Con too esto na mesa, entos sí podría falar del conciertu de Roger Waters en Granada. De cómo s'acrecentaba'l nerviosismu los tres cuartos d'una hora infinita que tuvimos naquel autobús pa cuartiar diez pocos kilómetros. De cómo arreventaba l'aniciu la nueche con un soníu tantu tiempu esperáu. De cómo Waters se fizo más humanu que lleenda, más formosu qu'iconu.

Nel escenariu una banda de músicos, na pista xente con distintu pasu de los años na mirada. Y suena «Shine on your crazy diamond» y aparez, d'un mou sentíu, que respiga la piel toa, la imaxe de Syd Barret na pantalla xigante. Tres les gafes de sol ta la so mirada, indescifrable décades depués. Waters canta-y al recuerdu vivu. Canta y too relluma.

Nesi momentu rellumante barruntes dalguna verdá -de les que rara vez allumennos per dientro- y sienteste fíu de la mesma sicodelia que'l tipu d'al llau, que te dobla vez y media la edá. Vuelves a los años brillantes onde les tardes acababen col to pá faciendo ximnasia y la banda sonora yera, yá pa siempre, la mesma.

Artículo publicado en lesnoticies.com