Retornamos como heroes

La solombra tamién ye un leiv motiv. La so silueta recortada nel desiertu, el sombreru fedora que sólo ye pa la so cabeza. L'heroe retorna a la gran pantalla, pero tien tantes buelgues cercando-y los güeyos qu'hasta los más creyentes dulden de si el látigu será'l mesmu, si la sorrisa-y caerá pel llau rectu. Los años nun pasen de baldre. Y los heroes nun quieren regatos de llechi pel pelo.

Pero tamos ehí, beatos, nel cine más grande qu'atopamos un llunes semimuertu, cola creyencia posada en George, en Steven, n'Harrison. Los nuesos dioses que compartimos enantes del primer besu. Ye la cuarta d'Indiana Jones y tamos nel cine como quien visita un templu con tolos ánxeles y los santos.

Sicasí, nesta haxiografía la lleenda pasa del oru al fierro. Yo revuélvome na butaca, bufo colos diálogos, espábiome con dalguna escena de les que rompen esi pactu de ficción pa volvese burdes y aburríes. Tu nóteslo y sigues la película, quiciabes con esfuerzu, nun me paro a pensalo.

Colos títulos de creitu yo doi por perdíu el míu ente lo que costó la entrada y la decepción d'esta última entrega d'una saga que meyor taba ensin tocar. Quedo cola mesma espresión de cabréu infantil que tanta gracia suel facete. La to cara ye distinta. Arrastres una tristura rara, como si a un guah.e-y contasen que'l so heroe vive tovía colos padres y trabaya realmente na tienda la esquina.

Tardé n'entender qu'ayeri yo fui al cine con otru, ensin tatuaxes o ciertu escarmientu de la vida. Fui al cine con un nenu que dexó de creyer en tantes coses, asina, de golpe. Y too por una película que nun taba a l'altura de la ellaboración de los mitos.

Volvíemos pa casa cuando en mitá d'una cai de Cimavilla, cola lluz naranxa d'una farola, distinguí na to solombra un xestu duru, de quien asume qu'el tiempu ta tamién pa que pase. Y retornamos, eso tu nun lo sabíes, como heroes.

Artículo publicado en lesnoticies.com

1 comentarios:

begoyrafa | 6 de junio de 2008, 1:02

Nooooooooo¡¡¡¡¡¡ Indiana, no, no se me puede acabar otro mito. Yo vi en Busca del Arca Perdida en el Arango, tenía 11 años y desde entonces quise ser Indi, y manejar el látigo como él y llevar ese sombrero y luchar contra los nazis.