Enllaceriaos

A y B tán nel sofá de casa, tiraos, col aspectu mutante que da un domingu depués d'entamala muncho. A y B fagociten ficción asgaya, toles series que l'anchu banda de la adsl permite baxar. Y cuando entamen a recuperar el sentíu, anque namás seya porque dir pa la cama cola resaca apunta perpetuala hasta'l llunes, ponen un poco les noticies.

Los presentadores, bien serios y col rigor espresivu que requier informar d'una posible epidemia, falen de dellos casos de gripe proveniente del gochu, de les primeres muertes, del mieu. Llama la má de B. «¿Tuvistis con dalguién que tuviera va poco en México?», «Non, con naide. Mamá, nun me rayes...». B cuelga. Llama una amiga d'A, que ta viviendo fuera col mozu. «¿Nun taréis malos?», «Sí, pero de lliala ayeri. ¿Qué vos pasa a toos?».

A y B imaxinen qu'esti ye l'iniciu d'una película d'eses de zombies. Que nun son zombies, que son enllaceriaos. Lo mesmo. Namás entamar, l'espectador yá siente'l desastre, pero los personaxes nun reaccionen -nun siendo'l típicu visionariu, al que naide fai casu y qu'en función de lo simpáticu que seya, sobrevive o muerre a les primeres de cambiu- hasta que yá ye tarde.

Na tele, xente andando pel aeropuertu, tapaos cola careta. Nel sofá, A y B tienen una sensación rara, como de tar habitando una película. La pregunta agora ye si se trata d'una de serie B, una d'humor, o si tocará enfrentase a una de George A. Romero...

El mapa colos enllaceriaos medra y encueye como un acordión. A y B nel sofá siguen mutando. En dalgún llugar dalguién da-y a la moviola.

Artículo publicado en lesnoticies.com

1 comentarios:

Manolo Arana | 30 de abril de 2009, 4:39

con zombies de por medio todo parece mejor (y qué bien suena así cómo tú lo dices).