Civilizáu como los animales

Nun ye la primera vegada que me sorpriendo a mi mesma faciendo por razonar col mio gatu. Como en cualquier familia que se precie, siempre hai ún bonu y ún malu, una suerte de yin y yan que, pa la nuesa tranquilidá, ente nós asociamos a los gatos. La gata ye bona, ye pa enseñar a les visites, guapa y llista, d'un supuestu padre montés. El gatu ye roxu, gordu, torpe inclusive nel xeitu del cariñu. Y ye, taba claro, pol que más miro. Y razono, cosa que sospecho que nun-y presta muncho, porque respuende mordiendo, y nun me queda otra qu'esplica-y que nun ye un perru, que rabuñe como tolos gatos.
Razono col mio gatu porque paso hores con él. Mientres trabayo, cuando llimpio, cuando asomo a la terraza. Somos como dos compañeros, si aceptamos qu'él ye'l compañeru más zánganu que na vida voi tener.

Por eso, porque me descubro a mi mesma razonando con un ser irracional, nun tenía que me sorprender esti tratu humanizáu que recibieron los protagonistes del romance de la temporada. Furaco y Tola representen la esencia del cortexu, dicen. Furaco ye bravu y persistente, y fixo les coses como tienen que facese con una dama como ye Tola. Furaco y Tola son portada de periódicos estos díes más que Belén Esteban. Furaco y Tola van tener nenos con fogazes embaxo'l brazu. Furaco y Tola son la balada, la canción de amor llixero, l'idiliu deseáu.

Ah, si a min me cortexaren como a Tola, diría la mio vecina, que nun pilla dende va muncho. Oh, si tolos mozos fueren como Furaco, escúchase na peluquería.

Sicasí, pue que'l mio gatu seya quien razone comigo. Quiciabes tenga que tomar exemplu de les llargues mañanes al sol, de la vida panza arriba. Ya lo dicía aquel, cuánto nos queda por deprender de los animales.

Artículo publicado en lesnoticies.com

2 comentarios:

Krasnaya | 28 de mayo de 2009, 7:45

¡¡¡¡PACA Y TOLA ASKATU!!!!

¡¡¡FURACO LLIBERTÁ!!!

Yo soy de Paca. Paca mola. Tola es una puñetera vendida, hombre...

Pf, xD

Grace en el País de Las Maravillas | 28 de mayo de 2009, 8:05

Oye que el gato ese aunque esté un poco "asilvestrao" es de buena familia!!! jejjeje