Diariu d´una poeta recién cansada (4)

La llei llimón

Como yá natural na mio xeneración, yo tamién soi adicta. Alcuentro evasión nel placer momentaneu, la duración ínfima de daqué estético, la guapura de la ficción. Soy adicta a les series, ye cierto. Y hasta agora nun pienso someteme a nengún tratamientu. La mio enfermedad poco daña fuera d´esti cuerpu y el mieu a una posible disociación, a volveme habitante d´un pensamientu máxicu –asina lu llama la psicología- ye nel fondu una prestosa bifurcación de la trama, anque seya la trama vital propia.
Ye tanta la ufierta de ficción en paquetinos de menos d´una hora que faigo mía la llei d´un de los personaxes de How I met your mother. Barney Stinson, conquistador incansable, nun podrá tar con toles muyeres del mundu, asina que fai la so criba cola llei llimón: “En diez minutos falando cola moza ún ya sabe si val la pena o no siguir tola nueche”. Diez minutos pa una vida ye menos q´una escena pa una serie. Esi tiempu sobra pal flechazu (y saber que depués de The Prisoner anda bien altu´l llistón) o l´escaezu (¿qué foi del remake de Knight Rider o The Sarah Connor Chronicles?).
Pero, dacuando, la llei llimón falla, y pasando capítulos desencierres el misteriu de Flashforward, namóreste d´Olivia Dunham y la ciencia llímite de Fringe. Y pienses si nun habrá otra llei llimón, automática, na to educaciónn sentimental. Una llei como un resorte que pon lloñe a xente que quiciabes necesitara dalgún capítulu más pa saber qu´ellos tamién te presten, que d´ellos tamién quies conocer la hestoria.



Columna publicada en el número 662 de Les noticies.

0 comentarios: