Diariu d´una poeta recién cansada (8)

Diariu d´una poeta recién cansada (8)

One of them

“La gloria de los xornaleros era terminar fuera de control!” dicía Alfredo González falando de la épica del ciclismu. La soledá del corredor de fondu, el xeitu d´arremeter l´agua… De siempre interesáronme más los deportes solitarios. L´arguyu de quien garra´l mundu por sí mesmu, coles sos manes atacaes de sudu. Nel fútbol nun yera quien a atopar tou esi fluxu heroicu, nin siquiera la comunión dominical de la victoria o´l fracasu.

Pero na ciudá d´arteries prietes, de cares ayenes, alcontré un poco d´esa pertenencia, un sentimientu peligrosu polo caldiu y acoyedor. Desque acompañara al aficionáu sportinguista peles cais de Madrid, ensamaes de voces y camisetes coloraes y blanques, formé parte del grupu, entendiáse que me movía´l mesmu sentir. Ceo deprendí los nomes de nuevos héroes, les fazañes, los trunfos.

Alleguemos a los aledaños del estadiu –siempre quixi dicilo-, vimos les aficiones d´unos y otros, l´hermanamientu poco frecuente, l´atmosfera de lo festivo. Mirábenme como si fuera una d´ellos. One of them nesta familia alrededor del xuegu d´una pelota, de lo evasivo del fin de selmana, la tregua fina del trabayu. One of them nun mundu raru, del que nun sé apenes nada, nin entiendo´ l credu nin rezo a los santos que correspuenden. Como tantes veces, nesta fiesta toi de pasu. Dexaré les voces de fondu, marcharé ensin conseña. Nel xuegu de lo ganao y lo perdío voy siguir dexando que´l balón bote hasta que salga del campu.

Columna publicada en el número 670 de Les Noticies.