Diariu d´una poeta recién cansada (9)

Diariu d´una poeta recién cansada (9)

Ganen los indios

Diba tener razón el paisanu aquel qu´un día espetóme que yéremos (yo y un ente invisible de mocedá que diba conmigo anque yo nun lu viere) la xeneración del refalfiu. Díxome esto mientres picaba na tierra y yo paseaba los mis inconscientes años. Quixi decir felices. Enantes de siguir, anuncio qu´esto pinga de pornografía sentimental, nun hai engañu.

Diba tener razón, si non de qué tantu rapaz con vocación d´actor, guah.a con ganes de facer versos, xente aspirante a un mundu más guapu. Claro, una xeneración refalfiada la nuestra, que creyera que con esfuerzu y talentu podía facese too, y depués resultó que non. Xeneración del refalfiu, que lo que nos sobraba yera actitú, anque andábemos col caparazón dalgo floxu pa llevar tolos golpes. Y con too, dacuando, yá lo dicía´l cantautor Alfredo González, ganen los indios.

Ganen, y ella llogra trabayar de lo suyo, cuando lo suyo ye la educación social (qu´andamos faltos pero paez que los d´arriba nun s´enteren); y él asoma yá na pantalla pequeñina y recibe aplausos nes tables. Y González y Moro siguen pela meseta y sienten como´l públicu canta los sos temes, y la xente de Truequedart llanza un proyeutu que suena como suenen les realidaes. Y va unos díes me dicíenme qu´Alba González Sanz ganaral Premio Gloria Fuertes con Apuntes de espera.

Quiciabes non fora asina, quiciabes el vieyu nos topara como indios na reserva, un fracasu oscilante dende los sos avezáos güeyos. Pero, dacuando, dizlo´l flacu de Turón, ganen los indios. Y entós llueve.

Columna publicada en el número 685 de Les Noticies.