Reseña de "Les páxines blanques" en Estoyu #02

Reseña de "Les páxines blanques" en Estoyu #02

El ruxir de los serenos

Les páxines blanques

Rubén d´Areñes

Uviéu. Ediciones Trabe, colección Albera 65, 48pp.

Premiu Ferrán Coronas 2008

Abrir un llibru como quien entra pa un cuartu. Mirar primero les paredes, el vacíu y l´orde que lu componen. Un cuartín escuru y ehí, colocada con procuru, atopamos la poesía abierta de Rubén d´Areñes, unes páxines blanques que, con too y con eso, nun son nueves.

Entama´l poemariu con “Cicatrices”, presentación de la so voz poética que ciarra con unos versos que fain eco: “Soi una páxina blanca/ acutada pa les esqueles”. Y siguen quince poemes de linguaxe delicado, de pallabres que cuerren como sangre, porque D´Areñes busca la plasticidá del verbu, como quien quier dibuxar la enerxía. Ello ye porque les pallabres capaces de dar vida, como nel casu d´ “Artículos robaos”.

Nos versos de Les páxines blanques, la ausencia ye un estáu climáticu, la humidanza y la escuridá, caldu de cultivu. La figura de la muyer nun ye la Wendy de Barrie, nin ye la solombra de Rilke, sicasí ye madre y dolor y necesidá y, claro, guapura. Asina ún de los poemes más sólidos d´esti llibru, “Cuando a ella- y duel”. Hai animales nes persones qu´habiten estes páxines. Hai pallabres como cicatrices, que namás busquen lo que busca la lliteratura, el poder de la evocación: llevanos pa casa.

Y ye que a D´Areñes se-y pue dar la mesma crítica que a otros autores mozos –casu d´Héctor Pérez Iglesias o Laura Casielles-, que la so mirada ye madura. Nun fala dende la prisa o el vértigu. Nun s´apura en facer crónica del so tiempu, sinon del tiempu. La infancia más que locus amoenus ye ancla, asina el poema “Les llecheres”. El tempus fugit abórdase dende la belleza, como n´ “Atapecer”. Crítica que nun ye tal, sinón la virtú d´esta poesía que nun se conforma. Que, dende la serenidá de lo aprendío, asume qu´el poeta ye un enfant terrible ensin querer. Que nun pue ser más que un cazador de relós, daqué críticu. Que, como diz el poeta Alberto Porlan, nun se xunta con otros cazadores (llibertadores de pallabres) porque yá se conocen.

Sofía Castañón