Diariu d´una poeta recién cansada (nosécuántosydalgúnmás)

Diariu d´una poeta recién cansada (nosécuántosydalgúnmás)

Autoría

Hai un home n´España que rexístralo too. Hai un home que mira polos derechos de los artistas, esa xente especial, que nun faen lladrillos, nin llimpien les cais, nin conducen autobuses, nin desgüesen jamones. Esi home, apellidau Bautista, nun quier qu´un autor pierda lo que ye suyo. Y, de perdelo, que-y quede a él y a la so iniciativa. La SGAE nun ye una institución, pero paezlo. Si nos despistamos, una ONG, un ente caritativu.

A grandes nomes de la vida pública, como Bautista o Sinde esmolezyos qu´un autor dexe de ganar les perres que-y corresponden. Anque pa ellos, autor (editor, lu llamen) ye daquién como Bisbal, por eso de que da vueltes sobre sí mesmo y tal orixinalidá-y pertenez. Lo que ya nun ye tan preocupante ye que se sepa de quién ye el qué.

Internet ye esi animal por amansiar. “Ehí nun esisten les regles del xuegu”, llamentaba la exdirectora de cine, güei Ministra de Cultura. Tien qu´haber regles, a ver si no. Nun queremos oyer nin lloñe´l término “anarquía”. Internet facilita descargar de baldre. Caca. Probe industria. Nadie diz que n´internet puen escaecer quién ye l´autor d´una semeya o d´un vídeu. Qu´internet siembra hongos, setes que ñacen por xeneración espontánea.

Eso nun importa. Eso nun se contabiliza, eso nun rinde. Eso ye, en too caso, pensar nos autores que xeneren cultura, que anden nel texíu d´un pueblu, que cuenten nel presente la historia de nueso.

Equí un autor ye un autor cuando dizlo la so nómina.

Artículu espublizau nel númberu del 07 de xineru de Les Noticies.