Diariu d´una poeta recién cansada (nosécuántosydalgúnmás)

Diariu d´una poeta recién cansada (nosécuántosydalgúnmás)

Kilómetros d´espaciu

Qué son diez kilómetros. Qué son, Alonso. ¿Vas dicímelu tu? ¿Son qué? Una hora más pa llegar a Madrid si sumamos y sumamos. Casi non. 110 kilómetros y toos lleven les manes a la cabeza. Que nun llexislen. Que nun nos quiten esos derechos nuestros. Si nun fumamos, si nun corremos: qué ye lo que somos. La nuestra identidá márcase en diez kilómetros. Y yá nun soi quién a camudalo. Que lo explique´l gurú. Que lo diga Alonso.

Si nel informativu los deportes manden, si les noticies cuenten col patrociniu de sponsors, nun voi dexar qu´ocupen tolos espacios. Esti kilómetru nun pertenez namás qu´a la dedicación. Que seya pa ellos, pa los guah.es de Truequedart, que trabayen na creyencia de qu´el trabayu tien resultaos. Tocar en La Riviera, preceder a Ojos de Brujo na so gira de despidida. Facer música con concencia, molestase en glayar verdaes y non tópicos. Imanol Núñez, Antón Ceballos, Sergio Pevida, Iván Lomas, Aníbal Menchaca, Mario Fueyo. Los sos nomes. Les sos voces y les sos manes tocando notes ciertes. Les ganes. La persistencia.

Qué son diez kilómetros n´ónde. Qué son n´America (onde dir a cien milles ye dir a ciento sesenta por hora). Qué son en Libia (onde la velocidá mídese n´otros parámetros). Aforrar enerxía nel kilometraxe, pero los tertulianos acuden quemando suela, quemando fuel, a dicir les babayaes de turnu.

Esti espaciu, esti kilómetru, pal que lu trabaya. ¿Que son collacios de los que falo? Y a honra. Nun voi dir yo tamién a pregunta-y al corredor de Fórmula 1 qué piensa de la velocidá, del puru vértigu.

En Les Noticies, nº 724