Un poema de Xandru Fernández para estos tiempos, para estas dudas

SECRETOS MÁS O MENOS VERGONZOSOS

El tallu d'un gorbizu,

la fueya d'una faya que güel a primavera,
la casa onde quemó la nuesa infancia,
les vértebres torcíes d'un mineru,
un naúfragu afamáiu que nun conoció
les nueses versiones del paraísu.

Enlleno la mio casa de semeyes que nun me dicen nada.

Enlleno estes ringleres de pallabres
que la memoria esborria,
confundiéndoles.

Un nome xuxuriáu contra un oyíu,

un mapa n'árabe flotando nel océanu.

Los más de mil secretos qu'en to casa y na mía

se guardaron con llave pa que naide nun dixera
que yéremos esto o aquello,
que nun yéremos eso o nun yéremos nada.

Votamos. Salimos a beber. Emborrachámonos.

Pulimos les mentires qu'heredemos
y al ritmu de la espicha convertímosles n'otres
que contar cuando los nuesos nos pregunten: ¿qué somos?
¿qué fuimos?
¿o nun yéremos nada?

Mirái, diremos, señalando'l firmamentu,

la cúpula del templu, la valla publicitaria.
Ehí tenéis lo que somos: los suaños
d'una sombra, dícenlo Píndaro y la estadística,
nun val pa nada ponese repunantes.

Venceremos, pero nun convenceremos. Los nuesos,

los fíos, los ñetos, mestizos por fin, ensin himnu nin patria,
vaciarán el sobráu onde guardemos les preguntes
que nun nos contestaron en casa, sacarán esos secretos
a la lluz, les biografíes
que nos dio vergüenza asoleyar.
Tamién la nuesa.
Consuélame pensar que tampoco
de la nuesa van saber avergonzase. 

de Xandru Fernández. Restauración (Trea, 2010)


Foto. Alejandro Nafría

0 comentarios: