Diariu d´una poeta recién cansada (nosécuántosydalgúnmás)

Diariu d´una poeta recién cansada (nosécuántosydalgúnmás)

Iconos ensin usar nel escritoriu

Rebáxame, tiempu. ¿Nun me ves? Ando de saldu. Tengo tares, tengo un corte que yá nun ye de temporada. Por tener, tengo corchetes y campana, llunares y hombreres. Rebáxame, tiempu, qu´ando desfasada perdía. Qu´entovía lleo periódicos cola fe de la que llevanta ceo pela mañana. Que siento les noticies y discuto cola radio, cola tele. Rebáxame, que soi una ciudadana de saldu, qu´amontona informaciones, que-y sangren partes del mundu y nomes propios que malapenes ye quien a pronunciar. Que detesto acumular iconos (iconografíaes tamién) nel escritoriu del portátil, que diría´l poeta de L.lena. Que creo que lo virtual sí ocupa espaciu.

Rebáxame, tiempu, que nun voi acorde contigo. Qu´esmolezme la falta de perspectiva, el tratamientu informativu de la tregua de ETA (¿quién fala yá d´ETA, non?), les babayaes de chigre vertíes nos debates televisivos sobre l´agresión del Conseyeru Cultura de Murcia, les insensateces de González-Sinde, que fala de too menos de comunicación, d´arte. Nun toi na onda, nun veo los programas líderes d´audiencia, nun sé quién ye esa xente que cuenta la so vida o esos guah.es que canten garrando´l micro como garren los pompones les cheerleaders americanes.

Rebáxame como tien que ser: tírame pel suelu. Manda, tiempu, a les tos dependientes qu´embarullen too esto, que nun quede claridá nenguna, que quede ente los dientes esi regustín prestosu a caos. Que cuando llegue la xente ande como si una revolución pasara per equí. Y que nun-yos importe que siga ensin pasar.

Artículu espublizau nel númberu del 23 de xineru de Les Noticies.