Destrumientu del xardín (your children aren't destroying it)
Equí la casa.
Si miren pela ventana van ver una familia
guapa como ella sola, col periódicu dobláu
na sección de deportes. Col perru grande,
el fornu prendíu.
Equí la casa, y dientro’l pan.
Si miren pela ventana van ver un trapecista
col cuerpu enllenu vendes. Van sentir el glayíu
d’un partu estremáu. Un gatu mariellu, cartes
entañalgaes.
Equí la casa, y el so retrañíu cárdenu.
Si miren pela ventana van ver un mapa intravenosu
peles parés, bermeyu como la furia. Van pensar
qu’españara un cuerpu na cocina mesma.
Miren bien. Van ver un llistáu de nomes,
cuentes bancaries, calificaciones universitaries.
Equí la casa, y dientro l’habitante que nun ye.
Esta tarde presentamos esti poemariu xunto con Dende tan lloñe, d'Héctor Pérez Iglesias y La solombra del flacu, de Rubén d'Areñes. Colos responsables d'Hesperya (Héctor Gómez Navarro y Alba González Sanz) y Antón García.
Na llibrería Cervantes d'Uviéu, a les 19h.
2 comentarios:
Me alegro mucho Sofía.
Me quedo con el último verso.
enormes besos...
Guapu no, lo siguiente!
Publicar un comentario