Diariu d´una poeta recién cansada (nosécuántos)

Diariu d´una poeta recién cansada (nosécuántos)

Aliones

Falamos d´altures. Les qu´atestaya´l tiempu y les que se crucien pelos aires. Falamos d´estes altures nes que tamos, onde yá somos quienes a entender qué ye lo que pasara y qué sedrá eso. Un paru. Un paru ensin nenguna de les dinámiques propies de la güelga. Eses güelgues que costaren a trabayadores del metro de Madrid nel branu los sos empleos. Eses güelgues que yá tán prohibíes notros países y naide nun diz nada.

Los controladores aéreos esisten, anque enantes nun paecieren más qu´una intuición, como ñubes escorriendo sobre les que posar los aviones. Esisten y pararon va unos díes, d´un xeitu ilegal, coactivu. Quiciabes porque queríen conseguir daqué, claro. Nun creo qu´estes midíes seyan platu de gusto pa naide.

Nun entro en si son, agora qu´arrecia´l temporal, los controladores aéreos quien tenga más motivos pa glayar. Nun entro en valoraciones como si se les pue considerar trabayadores o non. Esmolezme qu´entremos na consideración de quién son trabayaores y quién non. Los controladores son insolidarios porque fastidiaren les vacaciones de tantos. Lo del metro de Madrid porque dificultaben llegar al trabayu a tolos demás. El paru de los trabayadores molesta. A la voz de “güelga”, vamos a los chigres (sitios onde paez que los camareros nun trabayen).

Con esti paru, los controladores aéreos ficieron más que desencadenar l´estau d´alarma. Abrieren la puerta a la militarización contra les movilizaciones de trabayadores que quiciabes nun puedan contar con la güelga. Pararon, y a toos dexáronos ensin ales. Con too, hai quien espera a ver qué diz wikielaks, la post-llumada.

Artículo publicado en el número del 12 d´avientu de Les Noticies.