Diariu d´una poeta recién cansada (últimu)
El vezu de pesllar
Va tiempu yá, dalguién dixérame que nel espaciu que dacuando tenía pa falar de llibros o de cine o daqué, bien taba contar coses perimportantes. Nun-y falé entós de qu´el compromisu nun ye un discursu obviu, les más de les veces. Callé y al tiempu entamé a collaborar, gracies a la xenerosidá de Xuan Bello, na edición dixital de Les Noticies. Depués, les coses y la muda fueron pa Madrid y dende ellí apruciera esti diariu que nun ye tal. Un poco pola gracia de camuda-y el títulu a Juan Ramón Jiménez, autoridá incontastable na mi casa del añu pasáu.
Per equí pasara la vida y el so añacu. Les ausencies, les batalles que nun se ganaren (y les que sí), lo invisible y lo qu´hai quien miren por invisibilizar. Lo bono que nun vemos y qu´esiste porque tamién hai xente terco comprometío. Una voz, namás. Unos güeyos. Un vezu de tar que tamién precisa d´etapes. Esa manía tan común y nuesa, de dibuxar círculos como aniellos dientro d´un árbol.
Pesllé casi too d´un tiempu y namás arrastraba dalgún cabu. Ye preciso ciarrar la casa dacuando. Ye preciso entamar un cuadernu colos bordes llimpinos.
D´estes anotaciones nun hai intención d´aforrar lo efímero. Poco ye que permanezca, menos unes llínees.
D´esti espaciu, la xente que me fizo sentir como en casa, ellos saben quién. L´arguyu de compartir páxina con dellos meyores escritores d´esta tierra. De lo deprendío, muncho, gratitú. De lo que tea por venir, fermosu vértigu. Y pel camín, aguantar ensin perdenos.
Les Noticies, 17 d´abril de 2011
2 comentarios:
Xenerosidá la tuya, neña. Un besu, Xuan Bello
Una pena. La última razón pola que me prestaba mercar Les Noticies. El camín sigue. Nun dexes la to llingua, esta casina na que dalcuando nos atopamos unos pocos d'amigos.
Publicar un comentario